مرحبـا بـك!

مرحباً بكم في منتدى ألمانيا

Login with Facebook

التصنيفات

في هذه المشاركة

تجربة الصديق " كنان " في الحصول على فيزة الدراسه من بيروت
  • تجربتي بالحصول على فيزا الدراسه من سفارة ‫#‏بيروت‬


    بدي اتشكر كل اعضاء المجموعة من الأدمنز حتى الأعضاء استفدت من الموقع والغروب بشكل كبير .. باعتباري استفدت انا من هالمجموعة الحلوة واجب علي فيد غيري كمان .. تجربتي بالحصول عالفيزا هي كالتالي:



    ---
    أولا:القبول الجامعي وكيفية الحصول عليه :
    ---

    انا قبولي من جامعة Hochschule Bremen .. ماستر انكليزي European Studies شهادتي هي من جامعة القلمون الخاصة .. كلية العلاقات الدولية والدبلوماسية ..دفعة 2012 .. بدأت رحلة الحصول على القبول الجامعي بشهر حزيران تقريبا ومرحلة البحبشة على جامعة ممكن لاقي فيها ماستر بالانكليزي وباختصاصي ... صراحة كتير تعذبت لحتى لقيت هالجامعة وبعتت الاوراق اونلاين الاوراق هنن :
    1-وثيقة التخرج
    2-كشف العلامات
    3-رسالتين توصية
    4- رسالة دوافع
    5-صورة عن الباسبور
    6-صورة شخصية
    7-شهادة البكالوريا


    حملت الاوراق على موقع الجامعة ومابعتت اي شهادة لغة باعتباري دارس الجامعة باللغة الانكليزية وبعتت ايميل للمسؤول عن التسجيل بصعوبة الحصول على شهادة لغة بالظروف الحالية يلي عم نعيشها بسوريا .. ولاقت تفهم كبير منو وقبل ملفي متل ما هو بلا شهادة لغة .. بعد حوالي 25 يوم بيوصلني ايميل فيه القبول المبدئي

    وانو لازم ثبت التسجيل قبل 1-9 .. حتى يبعتولي القبول بالبريد العادي .. كنت عم حاول جيب قبول شرطي بالالماني بس ما قدرت باعتبار دراستي ادبية ...

    وبعتت ايميل للمسؤول وقال فيني اخود الايميل للسفارة وبيقبلوه




    ---
    ثانيا: مقابلة السفارة والتحضير لها
    ---

    فقدت الأمل بالحصول على قبول شرطي من اي جامعة بمنتصف شهر 9 وماكان معي كتير وقت لحتى ابعت المصاري باعتبار ماحسنت أمن كفيل بألمانيا.. بعد ما حولت المصاري 8200 صافي على شباركاسيه آخن ... واجهت مشكلة تأمين الموعد لقيت على موقع السفارة انو ممكن هنن يحجزولي موعد بشرط توفر 3 اوراق اساسية يلي هنن
    1- القبول الجامعي
    2- كشف الحساب\ورقة الكفيل
    3- صورة عن الباسبور


    وعنجد بعتت على ايميل السفارة انو ماعم احسن لاقي حجز ووراقي جاهزين .. بعتت الايميل ب 25-9 بعد يومين بعتولي موعد ب 8-10 ..
    (الأوراق المطلوبة بتوقع صارت محفوظة للمقابلة )


    المقابلة كانت كتير سلسة وسهلة بعد الخطوات يلي صارت معروفة من الشباك للخط الاصفر للنطرةشي 3-4 ساعات جوا والتعهد الامني والمصاري اللبناني ... بوصل لشباك فيه صبية لبنانية .. طلبت الاوراق الاصلية شافتون ورجعتلي ياهون .. طلبت النسخ رتبتون بترتيب معين .. وبلشت تكتب عالكمبيوتر قداما .. بعد شي 4-5 دقايق سئلتني وين بدي اسكن ؟ شو اسم تخصصك ؟ وشو اسم الماستر ؟ شو عملت بعد ماتخرجت ؟ وبس ... دفعت المصاري .. بصمت .. وقالت اخر شي استنى تلفون من السفارة بخصوص الفيزا واذا بدون وراق بيحاكوك ..

    ---
    ثالثا: الحصول على الفيزا والتأمين الصحي
    ---

    بتاريخ 1-12 بيدقلي رقم السفارة يلي حفظتو من كتر ماحاولت استفسر عن طلبي وماحدا يرد علي .. بتطلعي وحدة عم تحكي عربي مكسر بتقلي انت كنان اجتك الموافقة تعا استلم الفيزاوجيب تأمين صحي ..

    او بعات الباسبور والتأمين مع اي حدا .. تاني يوم طلعت فورا ع بيروت ورحت ع شركة AROPE للتأمين بالزلقا شارع ميشيل المر عملت التأمين 3 شهور ب 39$ ... اخدتو وفورا عالسفارة عالشباك عطيتو الباسبور وصورة عن التأمين وقلي تعا بعد ساعتين استلم الباسبور بالوصل يلي عطوك ياه وقت المقابلة

    .. وتوتة توتة خلصت الحتوتة ‏‎tongue‎‏ رمز تعبيري عقبال الجميع الموجودين هون

    ملاحظة: بفضل لمن لديه اي استفسار يكتبو هون مو عالخاص من شان الكل يستفيد مو بس هو

    الرجاء الاكبر لمن بدو يسأل سؤال يعمل حوصة بالغروب والبوستات المثبتة والموقع لانو في كتيييييييييييييييييييييييير أسئلة اجوبتا هونيك .. بس بدو مين "يعذب" حالو ويدور ... السؤال يلي جوابو فوق مالح جاوب عنو

    image
    3546.jpg
    720 x 960 - 95K
  • شكرا عل الموضوع الرائع
    استفدت الكثير من هذا الموضوع
    @Miran
  • هالشي كتير سعيده فيه @mustafa