مذكرات محمد وعبد الله : حلم الدراسة في المانيا ( عام التطور 2014) - منتدى ألمانيا

مرحبـا بـك!

مرحباً بكم في منتدى ألمانيا

Login with Facebook

التصنيفات

في هذه المشاركة

مذكرات محمد وعبد الله : حلم الدراسة في المانيا ( عام التطور 2014)
  • بدأ زمايلنا في الشغل يحسوا ان في حاجة شغلانة انا وعبدالله غير الشغل بس عمرهم ما كانوا يتوقعوا اننا في كلية علاج طبيعي وكانت كل الشكوك في اننا بنشتغل حاجة تانية وده كان باين علينا في الاهراق وكدة.....
    بدأوا يوقعوا بيني انا وعبدالله في الشغل من كتر الحقد الي كان مليهم وكانوا دايما يشجعوا عبدالله انه يسمع كلامهم عشان انا قريب قوي حيطردوني وعبدالله كان بيسجل الي بيقولوه بالموبايل ويجي يسمعني ونفضل نضحك عليهم لانهم فاكرين انهم ممكن يوقعوا بينا ...... كل ده واحنا بندرس في الكلية
    لحد لما جاه اليوم الي اقنعوا الدكتورة فيه انها تطردني وانهم مش محتاجني وده كان 1/4/2014 الموضوع في الاول ضايقنا احنا الاتنين بس قررنا ان عبدالله ميسبش الشغل ويفضل يجيب فلوس على قد ما يقدر وانا افضل في البيت واجمع معلومات على قد ما اقدر عن موضوع المانيا
    بس عبدالله كمل شهر كمان وسابلهم الشغل بعدها ...... ساعتها قولنا ان موضوع بنك الدم ده صفحة واتقفلت وقررنا ان احنا نسجل كورس اللغة الالمانية في جوته بالرغم من بدايته في وقت امتحانات الكلية .... وقررنا كمان اننا حنكون في المانيا في صيف 2015 وسمينا الهدف ده "Journey to the center of Berlin" .
    قبل الامتحانات بتاعت التيرم ما تبدأ بدأت حركة تكليفات المعهد تشتغل وبدأنا نلف ونجمع في ورق وحاجات كتير وقدمنا ورقنا عشان نستلم التكليف واترفضنا بسبب اننا مأجلين التجنيد بسبب الدراسة وقالولنا ازاي تستلموا تكليف وانتوابتدرسوا وناس تانية تقولنا حتوفقوا بين الشغل والدراسة ازاي - مش عارفين اننا كنا شغالين قبل كدة - والي يجنن بقى اننا لو كنا بنات كنا استلمنا تكليفنا على طول حاجة فعلا فظيعة ......المهم حولنا كتير لدرجة اننا روحنا وزارة الصحة في القاهرة وكلمنا وكيل الوزارة وبرضه مقدرش يفيدنا بحاجة واستعوضنا ربنا في تكليف المعهد الي مفروض نسد بيه فلوس الكلية ....... وبقينا مش عارفين هندفع التيرم الاول من سنة تانية ازاي .
    خلصنا امتحانات التيرم التاني واحنا شغالين في كورس الالماني A1 والحمد لله برضه درجتنا كانت كويسة وعبدالله طلع في الترتيب وانا جبت امتياز .
    بدأنا نقدم على شغل خاص وانا اتقبلت في معامل الشمس واشتغلت فيها وكان الشغل كويس ومش متعب خالص وعبد الله رجع البحوث شهر لانهم فعلا كانوا محتاجينه بس ضحكوا عليه في المرتب وسابهم وراح اشتغل في مستشفى مبرة العصافرة وما أدراك ما مبرة العصافرة .
    المهم الحمد لله اشتغلنا وجمعنا فلوس التيرم الاول لسنة تانية وبدأنا في المستوى التاني في الالماني في جوته
    خلا الفترة ديه عملنا مقابلات كتير وحضرنا ندوات وقابلنا مندوبة مؤسسة DAAD عشرات المرات لدرجة انها حفظتنا وحفظت ان جملة "it's a big idea " هي الشعار بتاعنا ودايما بتقولنا ان اللغة هي المفتاح واننا نذاكر الماني زي المجانين وفعلا اخدنا بنصيحتها وكملنا في الطريق ده .
    اخر يوم في سنة 2014 كان في حفلة في جوته واشتركنا فيها وعملوا مسابقة وطلعت انا وعبدالله المركز التاني واخدنا نص منحة لكورس B1 .

    إن مع العسر يسرا
  • لايك ادمن
  • لايك ادمن ... فعلا كتير مهمه قصص الخبرات في المانيا