مرحبـا بـك!

مرحباً بكم في منتدى ألمانيا

Login with Facebook

التصنيفات

في هذه المشاركة

تجربة السفر للصديق احمد للدراسه في المانيا
  • تجربتي في الحصول على الفيزا الدراسة...


    كانت مجرد كلام وصارت جد.. حلمي في السفر الى المانيا كان حلم طفولة لاني كنت بحب هالبلد وماكنت فكر بالسفر لغير هالبلد... والحمدلله ربي أكرمني وحققت مرادي... والفضل لله ثم لصديقي وأخي الغالي Ahmad Al Younes الي قدملي كل شي بيقدر عليه وشرحلي كتير خطوات ماكنت بعرفها..
    طبعاً بعد ماعرفت شو الأوراق المطلوبة والي هي وإلي أنا أخدتها معي كانت...

    1-شهادة بكالوريا مترجمة ومصدقة من الخارجية والعدلية بحلب بمعدل 84.2%
    2-كشف علامات مصدق ومترجم من الخارجية والعدلية بحلب
    3-اخراج قيد خارج القطر مصدق ومترجم
    4-لقاح ضد شلل الأطفال مصدق ومترجم
    5-CV+ Motivation letter بهي النقطة بالذات حابب احكي عنها شوي... لاني شفت كتير ناس كانت تقول اني لازم تكون حاكي فيها بدقة متناهية هلأ فكرة الدقة مو غلط بس مو لدرجة انك تشد كتير عليها ولا ترخي خلي كلشي واقعي ومافي اي كذب او زيادة او نقص يعني احكي كلشي صار بفترة حياتك وشوي عن الفرع الي عم تدرسو وشو خططك المستقبلية
    جهزت الأوراق وأنا بسوريا

    جددت جواز سفري (طالعت واحد جديد) بحكم القديم تالف اخدتو لمدة سنتين...
    عملت وكالة عامة لأخي كمان للحسبان اذا احتجت شي بسوريا يكون في حدا يحل مكاني..


    كنت عايش بسوريا تحت ضغط نفسي كتير كبير نتيجة للحكي الي كنت اسمعو من الناس انو طريق الشام مقطوع وطرقات ووضع خطر ومن هالحكي الفاضي بس ماكنت مصدق اطلع من سوريا
    الحمدلله طلعت ع الشام وبدون ماواجه اي عائق وبقيت ليلة وطلعت ع مطار دمشق حجزت بأجنحة الشام من دمشق-لبيروت

    24،500 ليرة سوري الرحلة اكلت معنا 3/4 الساعة

    نزلنا بالمطار كانت المعاملة سيئة جدا من قبل الأمن العام اللبناني بحكم كان قرار منع دخول السوريين ع لبنان جديد ومحدا عارف شي ايامها..

    طبعا في تنين سفروهن ع سوريا لان ممنوع تضل بمطار بيروت اكتر من 12 ساعة لموعد رحلتك المغادرة..

    وصلت مطار أضنة بتركيا حسيت حالي بغير دنيا معاملة راقية جدآ والأمن شافوني نابعرف احكي تركي ولا عارف كيف بدي وصل ع انطاكيا ساعدوني وخلوني عندن مدة 4 ساعات وامني بباص وصرفلي مصاري من دولار لتركي وسفرني..


    وصلت انطاكيا بقيت فيها فترة منيحة
    وبعدين رحت ع اسطنبول حجزت موعد عن طريق IData عطوني اياه بعد 9 شهور يعني بيوم 1 شهر 12

    حسيت بالصواب وماعاد اعرف شو أعمل حكيت مع شخص بيعرف مكتب حجز لعائلته منشان موضوع لم شمل وكان مقربلو الموعد من 6 شهور ل 26 يوم. وصلت للمكتب دفعت 150 دولار عطاني موعد بعد 5 أيام وطبعلي إياه
    قبولي من جامعة ديسبورغ ايسن ومعهد اللغة من Evo language بمدينة ماينز طبعاً جبت كورس A1 فقط كامل ب 550 يورو


    لغة ماعندي اي فكرة عنها أبدا مجرد معلومات من نت... سألتني الموظفة شو بتحكي لغات قلتلا انكليزي عربي قال انكليزيتك كيف قلتلا 80% قال تمام


    عملت المقابلة وكانت جيدة نوعا ما بس كان عندي مشكلة اني جايب كشف علامات لسنة الأولى بس بالجامعة بسبب مشاكل بالامتحانات بجامعة حلب بكليتي وماقدرت حصل كشف علامات للسنة 3 واذا بدي استنا كنت رح ضيع وقت كتير فقبلت أخد كشف حساب ع سنة وحدة بس وماكنت بعرف اني رح انسأل ع فترة انقطاع لبعد ماصرت بتركيا... حولت المبلغ 8،300 يورو ع بنك شباركاسه آخن من بنك الأهلي من السعودية
    الأسئلة كانت روتينية وجاوبت عليها كلا ليش اخترت المانيا واذا عندي قرايبين هناك او لا


    وليش تركت سوريا وهيك كلو تمام لحد ما سألتني شو عملت بفترة الانقطاع سنتين قلتلا اني سنة تالتة وكان في كتير مشاكل بالكلية وخربطة وقالولي بدها وقت لتتظبط وماحبيت ضيعت وقت فجبت كشف علامات لسنة وحدة بس... الموظفة كانت راقية بالتعامل اما مصرية شغل مغرب او تونس مابعرف بس حبابة كتير...
    مقابلتي اكلت 30 دقيقة تقريباً... طلعت خايف وضليت حاطط احتمال كبير للرفض اكتر من القبول...


    اليوم الحمدلله مانمت من مبارح سهران قلبي حسسني في شي وصرت بحبش بالغروب الغالي هون ع شي جديد لحتى آخد جرعة أمل وسالت وهيك والحمدلله الساعة 11:30 تقريباً دقولي وقالولي اجاك القبول وسفرك ب 17 الشهر الجاي جيب تأمين صحي والباسبور بعتو ب UPS طبعاً انا مارح ابعتو رح روووح شخصي انشالله.. وهي تجربتي بكل تفاصيلها بتمنى ساعد بقدر ما أخدت منكم وبتمنى كل شخص مقدم يحصل على الفيزا ويعيش هالفرحة... تحياتي لكل شخص وقف بجانبي بالأخص أخي وحبيبي وصديقي Ahmad

    Al-younes
    والسلام عليكم...
  • شكرا على المعلومات و التفاصيل ... عندي سؤال
    كيف فيني احصل على لقاح شلل الأطفال بتركيا ( مع العلم اني مقيم بتركيا من سنتين تقريبا)؟
    انا سالت بالمشافي الحكومية و الخاصة التركية و كان الجواب انو غير متوفر للسوريين البالغين هي الخدمة.
    شكراً سلفاً